!!!الله يرحمك يا رجولة!!!

السلام عليكم و رحمة الله و بركاته
النهاردة عاوزة اتناقش معاكم فى موضوع هجيبلكم شوية مواقف غالبيتها حصلت ادامى او قريتها فى منتدى

المنظر الاول:شوية ولاد حلقوا ع كام بنت فى الشارع ووسط الناس و قعدو يغتتو عليهم و نازلين رزالة
و اصحابهم بيضحكو و طبعا و لا دكر فى الشارع (لان محدش فيهم يستاهل لقب راجل)يدافع عن البنات دى ويزعق فى شوية الولاد دول
ملحوظة:طبعا فى كتير منكم هيقول البنات دى مكانتش لابسة محترم ..ماشى

المنظر التانى:فى القاهرة من كام سنة كده شوية شباب تقريبا كانو سكرانين كانو بيتهجمو على اى بنت فى الشارع و كان من البنات دى منقبات و محجبات كام واحدة منقبة دخلو مطعم جنبهم يستنجدو بالناس اللى فيه طبعا و لا حد سأل فيهم
كل واحد قال انا مالى ممكن اتضرب و لا العيال السكرانة دى يعملو فيا حاجة انا ادخل نفسى فى مشاكل ليه

المنظر التالت: بنتين دخلو اتوبيس كل الرجالة قاعدين و غالبية البنات واقفين طبعا مفيش بنى ادم من اللى قاعدين يخلى عنده دم و يقوم لواحدة بنت او ست

المنظر الرابع:موضوع فى منتدى <ليه تقوم لواحدة ست فى المترو> كاتب الموضوع (يا عينى بيشتكى) انه مرة حب يسترجل و قام هو واحد صاحبه لاتنين ستات اد امهاتهم لكن وهما واقفين كان الستات بيحكو عن الطبيخ و معرفش ايه و هو وصاحبه متعذبين طول الطريق و بيقول(يعنى هما بيتعبو و احنا لا)

المنظر الخامس: ولد و اخوه بيتخانقو مع واحد تالت و مكتفينه و نازلين فيه تقطيع و الشارع كله عمال يتفرج مفيش واحد حاول يتدخل (طبعا و هو يتدخل ليه ما ممكن يتقطع مع الولد)

و حاجات من دى كتير
ايه اللى بيحصل ؟؟
احنا مسلمين المفروض اننا بنعلم العالم كله مكارم الاخلاق و بنقتدى بالرسول عليه افضل الصلاة و السلام

ليه لما تشوف واحدة فى الشارع حد بيرزل عليها متدافعش عنها حتى لو هى لابسة مش كويس متقولش هى عايزة كده
مادام استنجدت بيك دافع عنها خليك راجل اعمل انت الصح حتى لو هى عملت الغلط و ثوابك عند ربنا

ليه لما تكون راكب اتوبيس او مترو او اى حاجة و لاقى واحدة ست واقفة متقوملهاش
حتى يا سيدى مثل ادام الناس بس شوف كام واحد هيخلى عنده دم و يعمل زيك

ليه و ليه وليه
ليه بتقول انا مالى ؟ ليه السلبية اللى بقت فى شبابنا دى؟
ليه مبقاش عندهم نخوة و شهامة؟
ليه ضاعت منهم الرجولة ؟
و لا هما مش عارفين معنى الرجولة اصلا؟


طبعا مش كل الشباب كده فى قليل منهم مش كده


عاوزة اسال كل واحد فيكم و ياريت الاجابة تكون بصراحة

لو شفت واحد فى الشارع بيرزل على واحدة بنت جاااامد هتوقفه عند حده و لا هتمشى و تقول انا مالى؟
لو كنت راكب اتوبيس وواحدة فى سن مامتك واقفة هتقوم و لا لا؟
لو حد فى الشارع طلب مساعدتك فى اى حاجة هتساعدو و لا لا؟

و سؤال للبنات وانتى ماشية فى الشارع بتبقى حاسة بالامان سواء كنتى لابسة محترم او لا؟
بتبقى حاسة ان لو حصلتلك حاجة مليون حد هيساعدك؟

بيبقى نفسى طويل لما اكون عارف انا بناقش مين ومين اللى بيتكلم مش واحد خايف ما يواجه او يتناقش بشخصيته الحقيقه وداخل يعمل نفسه شجاع بس بشخصيه تانى ؟؟الحمد لله الIP /بيشكف كل الناس

كلامك صح يا مس ايجيبت
و نورتى الموضوع